ມົງຄົນສູດຕັງ (ມັງຄະລະສູດຕັງ)

1. ເອວັມເມ ສຸຕັງ ເອກັງ ສະມະຍັງ ພະຄະວາ ສາວັດຖິຍັງ ວິຫະຣະຕິ ເຊຕະວະເນ ອະນາຖະປິນທິກັດສະ ອາຣາເມ ອະຖະໂຂ ອັນຍະຕະຣາ ເທວະຕາ ອະພິກກັນຕາຍະ ຣັດຕິຍາ ອະພິກກັນຕະວັນນາ ເກວະລະກັບປັງ ເຊຕະວັນນັງ ໂອພາເສຕ໌ວາ ເຍນະ ພະຄະວາ ເຕນຸປະສັງກະມິ ອຸປະສັັງກະມິຕ໌ວາ ພະຄະວັນຕັງ ອະພິວາເທຕ໌ວາ ເອກະມັນຕັງ ອັກຖາສິ ເອກະມັນຕັງ ຖິຕາ ໂຂ ສາ ເທວະຕາ ພະຄະວັນຕັງ ຄາຖາຍະ ອັດຊະພາສິ.

2. ພະຫູ ເທວາ ມະນຸດສາ ຈະມັງຄະລານິ ອະຈິນຕະຍຸງ ອາກັງຂະມານາ ໂສດຖານັງ ພຣູຫິ ມັງຄະລາມຸດຕະມັງ

3. ອະເສວະນາ ຈະ ພາລານັງ ປັນທິຕານັນຈະ ເສວະນາ ປູຊາ ຈະ ປູຊະນີຍານັງ ເອຕັມມັງຄະລະມຸດຕະມັງ

4. ປະຕິຣູປະເທສະວາໂສ ຈະ ປຸບເພ ຈະ ກະຕະປຸນຍະຕາ ອັດຕະສັມມາປະນິທິ ຈະ ເອຕັມມັງຄະລະມຸດຕະມັງ

5. ພາຫຸສັດຈັນຈະ ສິບປັນຈະ ວິນະໂຍ ຈະ ສຸສິກຂິໂຕ ສຸພາສິຕາ ຈະ ຍາ ວາຈາ ເອຕັມມັງຄະລະມຸດຕະມັງ

6. ມາຕາປິຕຸອຸປັດຖານັງ ປຸດຕະທາຣັດສະ ສັງຄະໂຫ ອະນາກຸລາ ຈະ ກັມມັນຕາ ເອຕັມມັງຄະລະມຸດຕະມັງ

7. ທານັນຈະ ທັມມະຈະລິຍາ ຈະ ຍາຕະການັນຈະ ສັງຄະໂຫ ອະນະວັດຊານິ ກັມມານິ ເອຕັມມັງຄະລະມຸດຕະມັງ

8. ອາຣະຕີ ວິຣະຕີ ປາປາ ມັດຊະປານາ ຈະ ສັນຍະໂມ ອັບປະມາໂທ ຈະ ທັມເມສຸ  ເອຕັມມັງຄະລະມຸດຕະມັງ

9. ຄາຣະໂວ ຈະ ນິວາໂຕ ຈະ ສັນຕຸດຖີ ຈະ ກະຕັນຍຸຕາ ກາເລນະ ທັມມັດສະວະນັງ ເອຕັມມັງຄະລະມຸດຕະມັງ

10. ຂັນຕີ ຈະ ໂສວະຈັດສະຕາ ສະມະນານັນຈະ ທັດສະນັງ ກາເລນະ ທັມມະສາກັດສາ ເອຕັມມັງຄະລະມຸດຕະມັງ

11. ຕະໂປ ຈະ ພຣັຫມະຈະລິຍັນຈະ ອະລິຍະສັດຈານະ ທັດສະນັງ ນິບພານະສັດສິກິຣິຍາ ຈະ ເອຕັມມັງຄະລະມຸດຕະມັງ

12. ຜຸດຖັດສະ ໂລກະທັມເມຫິ ຈິດຕັງ ຍັດສະ ນະ ກັມປະຕິ ອະໂສກັງ ວິຣະຊັງ ເຂມັງ ເອຕັມມັງຄະລະມຸດຕະມັງ

13. ເອຕາທິສານິ ກັດຕ໌ວານະ ສັບພັດຖະມະປະຣາຊິຕາ ສັບພັດຖະ ໂສດຖິງ ຄັດສັນຕິ ຕັນເຕສັງ ມັງຄະລະມຸດຕະມັນຕິ